ថ្នាំញៀនជិត២ខាំ និងមុខសញ្ញា៣នាក់ ត្រូវកម្លាំងសមត្ថកិច្ច ឃាត់ ជាបន្តបន្ទាប់
18-December-2017 | ដោយ ពលមនសិការ
បាត់ដំបង ៖ ជនសង្ស័យចំនួន៣នាក់ រួមជាមួយនឹងថ្នាំញៀនជិត២ខាំត្រូវបានកម្លាំងកងរាជអាវុធហត្ថខេត្ត ធ្វើការឃាត់ខ្លួនបានជាបន្តបន្ទាប់ ខណៈដែលសមត្ថកិច្ចបានចុះប្រតិបត្តិការចំនួនពីរលើក ក្នុងថ្ងៃតែមួយ ។
យោងតាមរបាយការណ៍របស់សមត្ថកិច្ច កងរាជអាវុធហត្ថខេត្ត បានអោយដឹងថាកិច្ចប្រតិបត្តិការលើកទី១ បានប្រព្រឹត្តឡើងនៅវេលាម៉ោង ១រសៀល ថ្ងៃទី១៧ ខែធ្នូ ឆ្នាំ២០១៧ ត្រង់ចំណុចភូមិ ព្រែកព្រះស្តេច សង្កាត់ ព្រែកព្រះស្តេច ក្រុង បាត់ដំបង ដោយកំលាំងការិយាល័យជំនាញ បានធ្វើការឃាត់ខ្លួនជនសង្ស័យ បានចំនួន ២ នាក់ ។
ជនសង្ស័យទាំងពីរនាក់ដែលសមត្ថកិច្ចឃាត់ខ្លួនបានគឺមានឈ្មោះ លី សីហា ភេទ ប្រុស អាយុ ៣០ ឆ្នាំ មុខរបរ កម្មករ ទីលំនៅភូមិ ដាំស្ពៃ សង្កាត់ ស្លាកែត ក្រុង បាត់ដំបងនិងឈ្មោះ អួន ងិ ភេទ ប្រុស អាយុ ២២ ឆ្នាំ មុខរបរ គ្មាន ទីលំនៅភូមិ វត្តរំដួល សង្កាត់ ចំការសំរោង ក្រុង បាត់ដំបង ។
នៅពេលនោះដែរ សមត្ថកិច្ចបានដកហូតនូវវត្ថុតាង មួយចំនួនរួមមាន គ្រឿងញៀនប្រភេទម៉ាទឹកកក ចំនួន ៤កញ្ចប់ ទម្ងន់២,៧០ ក្រាម គ្រឿងញៀនប្រភេទ អ៊ិចស្តាស៊ី ជាប្រភេទ ថ្នាំគ្រវី បានចំនួន ១០ គ្រាប់ ទូរស័ព្ទដៃ ៣ គ្រឿង និង ម៉ូតូ ១ គ្រឿង ។
លុះនៅវេលាម៉ោង ៣ និង ៣៥ នាទី រសៀល ថ្ងៃ ដដែល កម្លាំងជំនាញ បានចុះទៅកាន់ ភូមិនរា ឃុំនរា ស្រុកសង្កែ ខេត្តបាត់ដំបង ដោយបានធ្វើការឃាត់ខ្លួន ជនសង្ស័យ ម្នាក់ឈ្មោះ លឹម ហាក់ស្រស់ ភេទ ស្រី អាយុ ២៧ ឆ្នាំ មុខរបរ គ្មាន ទីលំនៅ ភូមិ វត្តលៀប សង្កាត់ ចំការសំរោង ក្រុង បាត់ដំបង ។
មុខសញ្ញាទី២ នេះ សមត្ថកិច្ចបានដកហូតវត្ថុតាងរួមមាន គ្រឿងញៀនប្រភេទម៉ាទឹកកក ចំនួន ១៥ កញ្ចប់ ទម្ងន់ ១៧៤ ក្រាម ទូរស័ព្ទដៃចំនួន ២ គ្រឿង និង ម៉ូតូ ១ គ្រឿង ម៉ាក ឃ្លីច ពណ៌ ស ស៊ែរី ឆ្នាំ ២០១៤ ពាក់ស្លកាលេខ បាត់ដំបង 1M- 9529 ។ បច្ចុប្បន្នជនសង្ស័យទាំងអស់ រួមជាមួយនឹងវត្ថុតាង ត្រូវបានកំលាំងការិយាល័យជំនាញកសាងសំណុំរឿង ដើម្បីបញ្ចូនទៅកាន់តុលាការ ៕
ចំនួនអ្នកទស្សនា
- ថ្ងៃនេះ9131
- ម្សិលមិញ10851
- សប្តាហ៍នេះ75651
- ខែនេះ190801
- ឆ្នាំនេះ190801
- សរុប20633257